Min birra

BeskánLuossaRock álggahuvvui 2014:s jahkásaš luossaoaggungilvvu guoimmuhanfálaldahkan ja lunddolaš oassin man Beskenjár gilisearvi lágidii Kárášjogas. Oaggungilvu geasset lei báikegotti jagi stuorámus dáhpáhus, ja ledje sierra gilvvut sihke mánáide ja ollesolbmuide. Oaggungilvu lei mánáide nuvttá fálaldat, man gilisearvi ieš álggahii ávžžuhan dihtii mánáid olgonastit.

Festivála álggii eahketdoallun oaggungilvvu maŋŋá ja báikkálaš sámi artisttat ledje prográmmas, maiddái dáidda doaluide besse mánát nuvttá sisa ollesolbmo mielde, vai mánát álkibu besset vásihit musihka. Nie riegádii BeskánLuossaRock. Festivála lea dan rájes lágiduvvon jahkásaččat (earret koronapandemiijajagis). Festiválaprográmmas leat árbevirolaš luođit, ođđaáigásaš luođit ja sámi populáramusihkka maid artisttat miehtá Sámi ovdanbuktet, ja festivála rahppo álo árbevirolaš luđiin.

Oaggungilvu lea heaittihuvvon bivdoráddjehusaid geažil jogas, muhto festivála lea seilon ja ávvudii 10 jagi 2025:s. Festiválajahki 2024 lei dehálaš jahki festivála historjái, go dalle ásahuvvui lassi festiválabeaivi mánáide ja nuoraide nuvttá sisabeassamiin, mii lei lunddolaš joatkka oaggungilvvu nuvttáfálaldagas mánáide.

Logijagiávvudeapmi lei dehálaš dáhpáhus festivála historjjás. Ávvudeami oktavuođas organisašuvdna viiddidii iežas fálaldaga maiddái fátmmastit ovttaskaslágidemiid birra jagi, ja festivála nu šattai ollesjagilágideaddjin.

Danne lei lunddolaš earuhit geassefestivála ja ovttaskaslágidemiid, ja organisašuvdna lonuhii nama Beaskán Doalut, ja geassefestivála doalaha namas ‘BeskánLuossaRock’ doaimma vuollesuorgin.